एजेन्सी, मुम्बई । बलिउड अभिनेता अक्षयकुमार अभिनीत चलचित्र ‘केशरी’ले पाँच दिनमा करिब ८८ करोड भारु कमाइ गरेको छ । रिलिजको पहिलो दिन बिहीबार २१ करोड भारु कमाइ गरेको उक्त चलचित्रले शुक्रबार १७ करोड र २० करोड कमाएको थियो ।
यसैगरी, आइतबार २२ करोड भारु कमाएको भारतीय सञ्चारमाध्यमले जनाएका छन् । बक्स अफिसमा यो चलचित्रको कमाइ निकै उत्साहजनक रहेको जनाइएको छ । यस चलचित्रले सजिलै सय करोडको आँकडा पार गर्ने समीक्षकले बताएका छन् ।
सोमबार ८ करोड बढीको कमाइ गरेको यसलाई दर्शकले निकै रुचाइरहेको बताइएको छ । चलचित्रमा अक्षयकुमार तथा अभिनेत्री परिणिति चोपडाको मुख्य भूमिकामा रहेको छ । यो ‘सारागढीको युद्ध’ मा आधारित ऐतिहासिक चलचित्र हो । संसारभरका कुल ४२०० पर्दामा रिलिज भएको यो चलचित्रको निर्माण करण जोहर तथा निर्देशन अनुराग सिंहले गरेका हुन् ।
